तुझेच मी गीत गात आहे मालिकेत अभिनेत्री वनिता खर...

तुझेच मी गीत गात आहे मालिकेत अभिनेत्री वनिता खरातची एण्ट्री (Vanita Kharat Entry In Tuzech Mi Geet Gaat Aahe Marathi Serial)

स्टार प्रवाहवरील ‘तुझेच मी गीत गात आहे’ मालिकेचं कथानक अतिशय उत्कंठावर्धक वळणावर येऊन पोहोचलं आहे. स्वरा आणि तिच्या बाबांची भेट होणार का याची उत्सुकता असतानाच आता मालिकेत रंजना या नव्या पात्राची एण्ट्री झाली आहे. सुप्रसिद्ध अभिनेत्री वनिता खरात रंजना हे पात्र साकारत असून मालिकेत तिचे स्वरासोबतचे खास सीन पाहायला मिळणार आहेत.

रंजना हे पात्र खूपच वेगळं आहे. रंजना एक छोटीशी खानावळ चालवत असते. वडिलांचा शोध घेत असलेल्या स्वरासोबत तिची भेट होते आणि काही काळासाठी ती तिला आपल्या खानावळीत आसरा देते. खास बात म्हणजे रंजना हे पात्र मालवणी भाषेत बोलतं. अभिनेत्री वनिता खरातसाठी मालवणी भाषेत बोलणं आव्हानात्मक होतं. मात्र सहकलाकारांच्या मदतीने मालवणी भाषेचा गोडवा जपत तिने हे पात्र खुलवलं आहे.

रंजनाचा स्वभाव थोडासा रागीष्ट आहे मात्र स्वराची पार्श्वभूमी कळल्यावर ती खूप प्रेमाने तिला जवळ करते. मालिकेत हा भावनिक प्रसंग प्रेक्षकांना पाहायला मिळणार आहे.

पडद्यामागेही स्वराची भूमिका साकाराणाऱ्या अवनीसोबत वनिताची खास गट्टी जमली आहे. इतक्या लहान वयात तिला असणारी समज पाहून थक्क व्हायला होतं. स्वरा साकारण्यासाठी अवनीने नागपूरी भाषा आत्मसात केली आहे. अतिशय गोड आणि हुशार अशा स्वरासोबत काम करताना अतिशय मजा आली अशी भावना वनिताने व्यक्त केली.