पिंकीचा विजय असो मालिकेतील पिंकीची हटके अंदाजात...

पिंकीचा विजय असो मालिकेतील पिंकीची हटके अंदाजात साजरी होणार वटपौर्णिमा ( Star Pravah vatpurnima Special Episode)

वरुणराजाचं आगमन झालं की तमाम स्त्रियांना वटपौर्णिमेच्या सणाची आतुरता असते. वडाची पूजा करुन पतीच्या दीर्घायुष्यासाठी प्रार्थना करणं हा या सणाचा महत्त्वाचा उद्देश. मराठी परंपरा, मराठी प्रवाह असं ब्रीदवाक्य असणाऱ्या स्टार प्रवाहवरील सर्वच मालिकांमध्ये वटपौर्णिमेचा उत्साह पाहायला मिळणार आहे.

पिंकीचा विजय असो मालिकेतील पिंकी तर हटके अंदाजात वटपौर्णिमा साजरी करणार आहे. खरंतर तिने वटपौर्णिमेचं व्रत करु नये म्हणून युवराजच्या आईने खूप प्रयत्न केले आहेत. परंतु पिंकीने हार न मानता सासूच्या नाकावर टिच्चून युवराजसकट त्याच्या गाडीलाच फेरे मारुन व्रत पूर्ण केले आहे.

स्वाभिमान मालिकेतील पल्लवी, आई कुठे काय करते मालिकेतील संजना आणि अनघा, ठिपक्यांची रांगोळी मालिकेतील अप्पू, मुरांबा मालिकेतील रमा, पिंकी आणि अबोली यंदा पहिली वटपौर्णिमा साजरी करणार आहेत. या खास सणासाठी सगळ्याच नायिकांनी जय्यत तयारी केली असून या सगळ्यांचा पारंपरिक लूक लक्ष वेधणारा आहे.

या व्यतिरिक्त रंग माझा वेगळा मालिकेत दीपा आणि कार्तिकचं नातं निर्णायक वळणावर आहे. कार्तिकीला कार्तिकच आपले बाबा आहेत हे सत्य कळलं आहे. त्यामुळे आई बाबांनी एकत्र यावं असं तिला मनोमन वाटतंय. आपल्या आईने बाबांसाठी वटपौर्णिमेचं व्रत करावं अशी कार्तिकीची इच्छा आहे. तर तिकडे ऐन वाटपौर्णिमेच्या दिवशी कार्तिकच्या अटकेसाठी पोलीस हजर झालेत. कार्तिकवरचं हे संकट दूर व्हावं यासाठी दीपा वटपौर्णिमेचं व्रत करणार आहे.

फुलाला सुगंध मातीचा मालिकेतही कीर्तीने शुभमसाठी वटपौर्णिमेचं व्रत केलं आहे. कर्तव्य आणि घरच्या जबाबदाऱ्या अशी कसोटी पार करत कीर्ती आपलं स्वप्न पूर्ण करत आहे. शुभमचा भक्कम पाठिंबा असल्यामुळेच कीर्ती आपलं ध्येय गाठू शकतेय. त्यामुळे कीर्ती-शुभमसाठी यंदाची वटपौर्णिमा खास आहे.

सुख म्हणजे नक्की काय असतं मालिकेतील जयदीप-गौरीसाठीही वटपौर्णिमा खास ठरणार आहे. दोघांमधले गैरसमज दूर झालेत. त्यामुळे गौरीही जयदीपसाठी वटपौर्णिमेचं व्रत करणार आहे, सहकुटुंब सहपरिवारमध्येही वटपौर्णिमेचा जल्लोष पाहायला मिळेल.

तेव्हा यंदा स्टारप्रवाहवर वटपौर्णिमेचा सोहळा खास असणार आहे, एवढे निश्चित.