रिवणावायली : बंडखोर मुलीच्या संघर्षाची कथा (Riv...

रिवणावायली : बंडखोर मुलीच्या संघर्षाची कथा (Rivanavayali : Social Struggle Of A Rebellious Young Girl)

मराठी चित्रपट हा नेहमीच प्रेक्षकांना समाजातील दुर्लक्षित घटकांकडे एक वेगळ्या दृष्टिकोनातून बघण्याची दृष्टी देत आला आहे. हेच मराठी चित्रपट बहू आयामी आणि विषयातील वैविध्य यामुळे नेहमीच चर्चेत राहिले आहेत. या चित्रपटातून कलाकारांची सामाजिक जाणीव सुद्धा लक्षात येत असून बिटरस्वीट या चित्रपटाच्या नंतर अक्षया गुरव ही अभिनेत्री पुन्हा एकदा एका सामाजिक विषयावर भाष्य करणाऱ्या चित्रपटामध्ये प्रमुख भूमिकेत दिसणार आहे.

           

‘रिवणावायली’ असे या चित्रपटाचे नाव असून, आज रोजी हा चित्रपट प्रदर्शित होत आहे. चित्रपटाचे नाव वेगळे आहे. रिवण म्हणजे वर्तुळ आणि वायली म्हणजे वेगळे! अर्थात्‌ एका वर्तुळात आयुष्य न जगता त्याच्यापासून वेगळं होऊन जगणाऱ्या तरुणीची ही कथा.

या चित्रपटातील भूमिकेविषयी अक्षया सांगते, ‘आपण सामाजिक दृष्टया कितीही पुढारलेलो असलो तरी कुठे ना कुठे अनिष्ट रूढी परंपरा या आपल्या पाठीमागे तग धरून असतात. स्त्री शिक्षणाच्या बाबतीत कितीही जनजागृती होत असली तरी कुठेतरी समाजात अनेक स्त्रिया शिक्षणापासून वंचित आहेत. तर शिकलेल्या स्त्रीला तिच्या स्वतःच्या पायावर उभं राहण्यापासून सुद्धा अडवलं जात आहे. अशाच एकदा बंडखोर मुलीची, तिच्या संघर्षाची कथा म्हणजे ‘रिवणावायली’.

याच चित्रपटाच्या विषयी पुढे ती सांगते, ‘कलाकार आपल्या कलेतून समाजाचं एक प्रतिबिंब उभं करत असतो. कलाकार समाजाचा देणेकरी असतो, त्याने सामाजिक विषय हाताळताना विषयाची संवेदनशीलता जाणून घेणे आणि त्यावर योग्य ती भूमिका घेणं ही त्याची जबाबदारी असते. तीच जबाबदारी मी या चित्रपटाच्या माध्यमातून पूर्ण करत आहे.’

अक्षया या चित्रपटात ‘ऐश्वर्या देसाई’ हे पात्र साकारत असून ती उच्च शिक्षण घेऊन आपलं स्वतःचं जगात एक वेगळं स्थान निर्माण करण्यासाठी संघर्ष करत आहे. या चित्रपटाचे निर्माता दिग्दर्शक डॉ. दिनेश कदम असून छायाचित्रण धनंजय कुलकर्णी यांनी केले आहे. या चित्रपटाची कथा प्राध्यापक राजन गवस यांची असून संजय पवार यांनी चित्रपटाची पटकथा लिहिलेली आहे. संगीत पार्थ उमराणी यांचे असून गीत वैभव देशमुख यांनी लिहिले आहेत. चित्रपटात अक्षया सोबत शशांक शेंडे, देविका दफ्तरदार, आकाश नलावडे, संतोष राजेमहाडिक, प्रताप सोनाली आणि कल्याणी चौधरी या कलाकारांची प्रमुख भूमिका आहे.