राज-कावेरीचा लग्न सोहळा! (Raj And Kaveri Weddin...

‘भाग्य दिले तू मला’ या ‘कलर्स मराठी’ वाहिनीवरील मालिकेतील लोकप्रिय जोडी राज आणि कावेरी आता लग्नबंधनात अडकणार आहेत.

गेले आठवडाभर ज्या लग्न सोहळय़ाची मालिकेत धामधूम सुरू आहे तो सोहळा दूरचित्रवाणीच्या पडद्यावर अनुभवण्याची वेळ जवळ येऊन ठेपली आहे. मोठय़ा धूमधडाक्यात या दोघांचे लग्न होणार आहे. ज्या क्षणाची वाट राज कावेरीसोबत अख्खा महाराष्ट्र बघत होता तो क्षण आता जवळ आला आहे. त्यांच्या या भव्यदिव्य लग्न सोहळय़ाचा दोन तासांचा विशेष भाग रविवारी, २६ फेब्रुवारीला दुपारी १ आणि संध्या ७ वाजता ‘कलर्स मराठी’वर पाहायला मिळणार आहे.

राज-कावेरी यांचा विवाह सोहळा आनंदात पार पडणार आहे. लग्नासाठी कावेरीचा खास मराठमोळा साज ल्यायली आहे. नऊवारी, नथ, शेला, हिरवा चुडा या लुकमध्ये कावेरी खूप सुंदर दिसते आहे. दोघांचाही अस्सल मराठमोळा बाज दिसून येणार आहे. लग्न पारंपरिक पद्धतीने पार पडणार आहे. सप्तपदी, मंगलाष्टक, सुनमुख सगळे विधीही पार पडणार आहेत.

या खास भागाच्या निमित्ताने मालिकेतील रत्नमाला म्हणजेच अभिनेत्री निवेदिता सराफ म्हणाल्या, ‘‘रत्नमालासाठी तिच्या आयुष्यातील सर्वात आनंदाचा दिवस आहे, कारण याच दिवसाची वाट ती कुठे तरी बघत होती. कावेरीच्या आयुष्यात येण्याने राजमध्ये खूप बदल झाले आहेत. मालिकेत रत्नमाला आणि राजचं नातंदेखील दृढ झालं आहे. आता मालिकेत राज-कावेरीचं लग्न होणार आहे. सेटवर अगदी आनंदी वातावरण आहे, जय्यत तयारी सुरू झाली आहे. मोहितेंचं घर सकारात्मकतेने, आपल्या माणसांनी, नातेवाईकांनी बहरून जाणार आहे. जितका आनंद आम्हाला आहे किंबहुना त्यापेक्षा अधिक आनंद महाराष्ट्रातील तमाम जनतेला आहे, कारण तेदेखील या दिवसाची वाट आतुरतेने बघत होते. तेव्हा राज-कावेरीच्या लग्नाला नक्की यायचं हे आमच्याकडून सगळय़ांना आग्रहाचे निमंत्रण आहे.’’