‘काचा बादाम’चा फेम भुबन बद्याकार यांच्या कारचा ...

‘काचा बादाम’चा फेम भुबन बद्याकार यांच्या कारचा अपघात, गंभीर दुखापतीमुळे प्रकृती चिंताजनक (Kacha Badam singer Bhuban meets with car accident)

‘काचा बादाम’ गाण्यामुळे रातोरात स्टार झालेले भुबन बद्‌याकार यांचा सोमवारी रात्री अपघात झाला आहे. पश्चिम बंगालच्या बीरभूमी येथे त्यांच्या कारला अपघात झाला. त्यानंर भुबन यांना तत्काळ रुग्णालयात दाखल करण्यात आलं असून त्यांच्यावर उपचार सुरू आहेत. मात्र त्यांना गंभीर दुखापत झाल्यानं प्रकृती चिंताजनक आहे. त्याच्या अपघाताच्या वृत्तानं सर्वांनाच धक्का बसला आहे. त्यांचे चाहते त्यांची प्रकृती लवकर ठीक व्हावी यासाठी प्रार्थना करत आहेत.

भुबन यांनी काही दिवसांपूर्वीच एक कार खरेदी केली होती. कार चालवायला शिकत असतानाच त्यांचा अपघात झाला अशी माहिती मिळत आहे. भुबन यांच्या छातीला गंभीर दुखापत झाल्याचंही बोललं जात आहे. सध्या त्यांना बीरभूमीमधील सुपर स्पेशलिटी रुग्णालयात दाखल करण्यात आलं असून त्यांच्यावर उपचार सुरू आहेत.

भुबन बद्‌याकार हे पश्चिम बंगाल येथे राहतात. त्या ठिकाणी ‘काचा बादाम’ हे गाणं गात ते शेंगदाणे विकण्याचं काम करत असत. एका व्यक्तीनं ते गाणं गात असताना त्यांचा व्हिडीओ रेकॉर्ड केला आणि सोशल मीडियावर शेअर केला. त्यानंतर हा व्हिडीओ बराच व्हायरल झाला आणि भुबन बड्याकार रातोरात स्टार झाले.

अलिकडच्या काळात भुबन यांनी मुंबईतील एका मोठ्या हॉटेलमध्ये परफॉर्म देखील केलं होतं. एवढंच नाही तर त्यांनी एका म्यूझिक कंपनीसोबत गाणं गायलं आणि व्हिडीओ देखील रेकॉर्ड केला. ज्यातून त्यांना ३ लाख रुपये मिळाले होते. या म्यूझिक कंपनीनं भुबन यांच्यासोबत एक कॉन्ट्रॅक्ट साइन केलं आहे. याशिवाय भुबन यांच्या टॅलेंटसाठी पश्चिम बंगाल पोलिसांनी त्यांचा सत्कार केला होता.