झलक दिखला जा १० : गुंजन सिन्हाने जिंकलं ‘...

झलक दिखला जा १० : गुंजन सिन्हाने जिंकलं ‘झलक दिखला जा १०’चं विजेतेपद (Jhalak Dikhhla Jaa 10 Grand Finale Gunjan Sinha and Tejas Verma win the trophy)

कलर्स वाहिनीवरील ‘झलक दिखला जा १०’ या डान्स रिॲलिटी शोचा ग्रँड फिनाले नुकताच पार पडला. मोठमोठ्या सेलिब्रिटींना मात देत आठ वर्षांच्या गुंजन सिन्हाने या शोचं विजेतेपद मिळवलं. तिच्यासोबत १२ वर्षांचा तिचा डान्सिंग पार्टनर आणि कोरिओग्राफर सागर यांचाही सन्मान करण्यात आला. रुबिना दिलैक आणि फैजल शेख या दोघांना गुंजनने हरवलं. तर गुंजन, रुबिना, फैजल यांच्यासह गश्मिर महाजनी, श्रीती झा आणि निशांत भट्ट हे स्पर्धक टॉप ६ मध्ये पोहोचले होते.

विजेत्याचं नाव घोषित करण्याआधी परीक्षक करण जोहरने सांगितलं की, “डान्स रिॲलिटी शोच्या इतिहासात पहिल्यांदाच एखाद्या ग्रँड फिनालेमध्ये अशी गोष्ट घडतेय. ‘झलक दिखला जा १०’ च्या तिन्ही स्पर्धकांमध्ये बरोबरीचा सामना झाला आहे. मात्र इंटरनॅशनल डान्स फॉरमॅटचा विचार करून आम्ही विजेता ठरवतोय.”

गुंजन, तिचा साथीदार तेजस आणि कोरिओग्राफर सागर यांना २० लाख रुपये बक्षीस म्हणून मिळाले. याआधी गुंजनने ‘डान्स दिवाने ज्युनिअर’ या रिॲलिटी शो मध्ये भाग घेतला होता. मात्र हा शो ती जिंकू शकली नव्हती. त्यानंतर हार न मानता तिने झलक दिखला जा १० मध्ये भाग घेतला. या शोच्या परीक्षकांमध्ये करण जोहरसह माधुरी दिक्षित आणि नोरा फतेही यांचा समावेश होता.

आठ वर्षांच्या गुंजनचा जन्म 2014 मध्ये गुवाहाटीमध्ये झाला. आपल्या दमदार नृत्य कौशल्याच्या जोरावर अत्यंत कमी वयात गुंजनने नाव कमावलं. गुंजनचे वडील रणधीर सिन्हा हे पोलीस अधिकारी आहेत तर आई हिमाद्री गृहिणी आहे. अत्यंत कमी वयापासूनच गुंजनने नृत्याचं प्रशिक्षण घेण्यास सुरुवात केली. डान्स दिवाने ज्युनिअर या शोमध्ये तिने कोरिओग्राफर सागर बोरा याच्यासोबत भाग घेतला होता. या शोच्या ग्रँड फिनालेपर्यंत गुंजन पोहोचली होती. मात्र ती हा शो जिंकू शकली नव्हती.